ການເກັບຄ່າທຳນຽມຜ່ານຕູ້ອັດຕະໂນມັດ ຍັງມີຄວາມຫຍຸ້ງຍາກ

298

ລະບົບເກັບຄ່າທຳນຽມພາຫະນະເຂົ້າ – ອອກຂອງດ່ານສາກົນຂົວມິດຕະພາບ ລາວ – ໄທ 1 ຜ່ານຕູ້ອັດຕະໂນມັດ ( KIOSK ) ຍັງມີຄວາມສັບສົນ ແລະ ຫຍຸ້ງຍາກຫຼາຍ. ແຕ່ເຖິງຢ່າງໃດກໍຕາມ, ຖ້າຫາກການໃຊ້ລະບົບມີຄວາມຄ່ອງແຄ້ວແລ້ວການເກັບລາຍຮັບເຂົ້າງົບປະມານຈະໄດ້ເພີ່ມຂຶ້ນ ແລະ ການເຂົ້າ – ອອກຂອງປະຊາຊົນຈະມີຄວາມສະດວກ ແລະ ວ່ອງໄວ.

ອີງຕາມການເປີດເຜີຍຂອງ ທ່ານ ທອງທິບ ສີວິໄຊ ຮັກສາການຫົວໜ້າຫ້ອງການຄຸ້ມຄອງ ແລະ ບໍລິການດ່ານສາກົນ ຂົວມິດຕະພາບ ລາວ – ໄທ 1 ນະຄອນຫຼວງວຽງຈັນ ໃຫ້ຮູ້ວ່າ: ໃນປີ 2018 ຜ່ານມາ ທາງດ່ານໄດ້ມີການຍົກລະດັບ ແລະ ປັບປຸງວຽກງານບໍລິການຢູ່ພາຍໃນ ເພື່ອເຮັດໃຫ້ການບໍລິຫານວຽກງານໃຫ້ມີສະພາບພົ້ນເດັ່ນຂຶ້ນ ແລະ ສ້າງຄວາມສະດວກໃນການຈັດເກັບລາຍຮັບເຂົ້າງົບປະມານຢູ່ດ່ານແຫ່ງນີ້ມີຄວາມເປັນລະບົບ, ວ່ອງໄວ, ໂປ່ງໃສ, ບໍ່ຮົ່ວໄຫຼ ແລະ ກວດສອບໄດ້. ດັ່ງນັ້ນ, ກົມພາສີ ກະຊວງການເງິນ ຮ່ວມກັບ ທະນາຄານ ການຄ້າຕ່າງປະເທດລາວ ມະຫາຊົນ ໄດ້ປັບປຸງການເກັບເງິນຜ່ານປະຕູດຽວ ແລະ ໄດ້ເປີດລະບົບເກັບຄ່າທຳນຽມພາຫະນະເຂົ້າ – ອອກຜ່ານຕູ້ອັດຕະໂນມັດ ( KIOSK ) ຢ່າງເປັນທາງການໃນທ້າຍປີຜ່ານມາ ເນື່ອງຈາກພັກ – ລັດໄດ້ກຳນົດເອົາດ່ານແຫ່ງນີ້ເປັນດ່ານຕົວແບບໃຫ້ແກ່ທົ່ວປະເທດ ຖ້າໂຄງການນີ້ສຳເລັດຈະມີຜົນດີຫຼາຍຢ່າງ ເປັນຕົ້ນ: ເຮັດໃຫ້ເກັບເງິນເຂົ້າງົບປະມານຄົບຖ້ວນ, ບໍ່ຮົ່ວໄຫຼ ແລະ ປະຊາຊົນທີ່ມາໃຊ້ບໍລິການກໍມີຄວາມເຊື່ອໝັ້ນ. ນອກນີ້, ຍັງເຮັດໃຫ້ການບໍລິການຄ່ອງແຄ້ວໄວຂຶ້ນຕື່ມອີກ ແຕ່ການຈັດຕັ້ງປະຕິບັດຕົວຈິງກໍຄືປະຊາຊົນເຂົ້າ – ອອກຍັງມີຄວາມສັບສົນ ແລະ ພົບ ຄວາມຫຍຸ້ງຍາກຫຼາຍ ເນື່ອງຈາກຍັງເປັນລະບົບໃໝ່ຜູ້ມາໃຊ້ບໍລິການຍັງບໍ່ລຶ້ງເຄີຍ ເຮັດໃຫ້ທັງພາຫະນະ ແລະ ຄົນອັ່ງອໍຢູ່ພາຍໃນດ່ານ ໂດຍສະເພາະໃນທ້າຍອາທິດ.

ແຕ່ເຖິງຢ່າງໃດກໍຕາມ, ໃນເບື້ອງຕົ້ນອາດຍັງພົບຄວາມຫຍຸ້ງຍາກ ແລະ ສັບສົນສົມຄວນ ເຊິ່ງໃນຕໍ່ໜ້າຖ້າວ່າທຸກຢ່າງເຂົ້າສູ່ລະບົບແລ້ວມັນຈະສະດວກຫຼາຍຂຶ້ນ ເປັນຕົ້ນ: ການເກັບລາຍຮັບເຂົ້າງົບປະມານຈະບໍ່ຮົ່ວໄຫຼ ເພາະເງິນຈະເຂົ້າສູ່ລະບົບທະນາຄານ ແລະ ປະຊາຊົນຜູ້ເຂົ້າ – ອອກທີ່ຮູ້ນຳໃຊ້ລະບົບຢ່າງຄ່ອງແຄ້ວແລ້ວຈະຍິ່ງສ້າງ ຄວາມສະດວກ ແລະ ວ່ອງໄວຂຶ້ນຕື່ມ, ສ່ວນເບື້ອງເສດຖະກິດແນ່ນອນການຂຶ້ນແຜນຕົວເລກການຈັດເກັບຈະຊັດເຈນຍິ່ງຂຶ້ນ ແລະ ໄດ້ຕາມເປົ້າໝາຍທີ່ວາງໄວ້ ເນື່ອງຈາກເປັນລະບົບທັນສະໄໝ ມັນຈະສະດວກ, ວ່ອງໄວ, ໂປ່ງໃສ ແລະ ສາມາດກວດສອບໄດ້ “ ທ່ານ    ທອງທິບ ສີວິໄຊ ກ່າວ ”.

ທ່ານ ທອງທິບ ສີວິໄຊ ກ່າວຕື່ມວ່າ: ໃນປີ 2018 ດ່ານສາກົນຂົວມິດຕະພາບ ລາວ – ໄທ 1 ນະຄອນຫຼວງວຽງຈັນ ມີປະຊາຊົນມາໃຊ້ບໍລິການເຂົ້າ – ອອກ 5 ລ້ານກວ່າຄົນ. ໃນນີ້, ສຳລັບຄົນເຂົ້າ 2,6 ລ້ານ ກວ່າຄົນ, ສ່ວນຂາອອກ 2,7 ລ້ານກວ່າຄົນ; ພາຫະນະເຂົ້າ – ອອກ ເກືອບ 8 ແສນຄັນ. ໃນນີ້, ພາຫະນະເຂົ້າ 3,8 ແສນກວ່າຄັນ, ສ່ວນພາຫະນະຂາອອກ 4 ແສນກວ່າຄັນ; ສຳລັບນັກທ່ອງທ່ຽວຜ່ານດ່ານ ປີ 2017 ມີ 29 ພັນກວ່າຄົນ, ສ່ວນປີ 2018 ມີ 36 ພັນກວ່າຄົນ; ດ້ານການເກັບລາຍຮັບງົບປະມານ ໃນປີ 2017 ສະເພາະຢູ່ດ່ານຂົວມິດຕະພາບ ແຜນເກັບລາຍຮັບທັງໝົດ 1.200 ຕື້ກີບ ປະຕິບັດໄດ້ 1.015 ຕື້ກີບ ເທົ່າກັບ 84,64%; ສຳລັບແຜນຈັດເກັບລາຍຮັບເຂົ້າງົບປະມານປີ 2018 ນັບທັງຢູ່ດ່ານທ່ານາແລ້ງ ແລະ ດ່ານຂົວມິດຕະພາບ 3.247 ກວ່າຕື້ກີບ ປະຕິບັດໄດ້ 2.793 ຕື້ກີບ ເທົ່າກັບ 86,02% ຂອງແຜນການປີ.

CR:laoedaily