ຫວຽດນາມ ຊ່ວຍສ້ອມແປງຫໍພິພິທະພັນປະຫວັດສາດກອງທັບ ກວ່າ 13 ຕື້ກີບ

279

ໂຄງການປັບປຸງບູລະນະສ້ອມແປງຫໍພິພິທະພັນປະຫວັດສາດກອງທັບປະຊາຊົນ ໄດ້ຮັບເງິນຊ່ວຍເຫຼືອລ້າຈາກກອງທັບປະຊາຊົນຫວຽດນາມ ມູນຄ່າຫຼາຍກວ່າ 13 ຕື້ກວ່າກີບ ຄາດຈະເລີ່ມລົງມືແຕ່ຕົ້ນເດືອນກຸມພາ ໃຫ້ສຳເລັດໃນເດືອນກັນຍາ 2019 ທີ່ຈະມາເຖິງນີ້.
ວັນທີ 19 ມັງກອນ 2019 ໄດ້ຈັດພິທີວາງສີລາລືກ ໂຄງການ “ ສ້ອມແປງ ປັບປຸງ ຫໍພິພິທະພັນປະຫວັດສາດກອງທັບປະຊາຊົນລາວ ” ຂຶ້ນທີ່ຫໍພິພິທະພັນປະຫວັດສາດກອງທັບປະຊາຊົນລາວ ໂດຍເຂົ້າຮ່ວມເປັນປະທານຂອງ ທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ, ທ່ານ ພົນເອກ ໂງ ສວນລິກ ລັດຖະມົນຕີກະຊວງປ້ອງກັນປະເທດ ແຫ່ງ ສສ ຫວຽດນາມ, ທ່ານ ຫງວຽນ ບ່າຮຸງ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສສ ຫວຽດນາມ ປະຈຳລາວ ພ້ອມດ້ວຍຄະນະບໍລິສັດ ລາວີນາໂກ 36 ຈຳກັດຜູ້ດຽວ, ອ້າຍນ້ອງນາຍ – ພົນທະຫານທັງສອງຝ່າຍເຂົ້າຮ່ວມ.

ທ່ານ ພົນຕີ ສອນທອງ ພົມລາວົງ ຮອງຫົວໜ້າກົມໃຫຍ່ການເມືອງກອງທັບ ໄດ້ກ່າວໃນພິທີວ່າ: ນີ້ແມ່ນເຫດການທີ່ມີຄວາມໝາຍສຳຄັນທາງປະຫວັດສາດຂອງກອງທັບເຮົາ ທັງເປັນນິມິດໝາຍທີ່ດີແກ່ສາຍພົວພັນມິດຕະພາບ, ຄວາມສາມັກຄີພິເສດ ແລະ ຮ່ວມມືຮອບດ້ານທີ່ເປັນມູນເຊື້ອລະຫວ່າງສອງຊາດສອງກອງທັບ ລາວ – ຫວຽດນາມ ໂດຍໂຄງການນີ້ໄດ້ມອບໃຫ້ບໍລິສັດ ລາວີນາໂກ 36 ຈຳກັດ ຜູ້ດຽວ ເປັນຜູ້ຮັບເໝົາປັບປຸງ ບູລະນະສ້ອມແປງດ້ວຍທຶນຊ່ວຍເຫຼືອລ້າ ຈາກກະຊວງປ້ອງກັນປະເທດ ແຫ່ງ ສສ ຫວຽດນາມ ໂດຍມີມູນຄ່າປະມານ 36,7 ຕື້ດົງ ຫຼື ເທົ່າກັບ 13,5 ຕື້ກີບ ໂດຍຈະຕ້ອງໃຊ້ໄລຍະເວລາທັງໝົດ 8 ເດືອນໃນການບູລະນະສ້ອມແປງ ເຊິ່ງຈະເລີ່ມໃນເດືອນກຸມພາ ຫາ ກັນຍາ 2019 ນີ້.

ທ່ານ ເຈືອງ ກົງທີງ ອຳນວຍການ ບໍລິສັດ ລາວີນາໂກ 36 ຈຳກັດຜູ້ດຽວ ໄດ້ກ່າວວ່າ: ການບູລະນະສ້ອມແປງຫໍພິພິທະພັນປະຫວັດສາດກອງທັບປະຊາຊົນລາວໃນຄັ້ງນີ້ແມ່ນຂອງຂວັນອັນລ້ຳຄ່າຂອງກອງທັບປະຊາຊົນຫວຽດນາມມອບໃຫ້ກອງທັບປະຊາຊົນລາວ ເນື່ອງໃນໂອກາດ ຄົບຮອບ 70 ປີ ວັນສ້າງຕັ້ງກອງທັບ. ເນື້ອທີ່ທີ່ຕ້ອງບູລະນະສ້ອມແປງທັງໝົດແມ່ນ 5.655 ຕາແມັດ ເຊິ່ງເປັນການບູລະນະສ້ອມແປງເກືອບທັງໝົດຂອງຫໍພິພິທະພັນ ບໍ່ວ່າຈະເປັນຫຼັງຄາ, ປ່ຽນເພດານ, ປູພື້ນ, ລະບົບປັບອາກາດ ແລະ ທັງໝົດດ້ານໜ້າຂອງຫໍພິພິທະພັນ. ບໍລິສັດຂອງພວກເຮົາແມ່ນມີປະສົບການກໍ່ສ້າງໃນລາວມາຫຼາຍປີ ເຊິ່ງນີ້ເປັນໂຄງການໜຶ່ງທີ່ມີຄວາມໝາຍສຳຄັນຢ່າງຍິ່ງທີ່ທັງສອງຊາດ ສອງກອງທັບໄດ້ໃຫ້ ຄວາມໄວ້ວາງໃຈມອບໂຄງການນີ້ໃຫ້ບໍລິສັດເຮົາ ແລະ ພວກເຮົາຈະທຸ່ມເທໝົດແຮງກາຍແຮງໃຈຕໍ່ການປັບປຸງສ້ອມແປງໃຫ້ໄວທີ່ສຸດ ແລະ ໄດ້ຮັບປະສິດທິພາບສູງສຸດໃຫ້ສົມກັບຄວາມໄວ້ວາງໃຈດັ່ງກ່າວ.

CR:Laoedaily