ລົງຈອດດ້ານມືດກ່ອນໝູ່! ນາຊາ ຂໍຮ່ວມມືໃນໂຄງການສໍາຫຼວດດວງຈັນກັບຈີນ

234

ອົງການອາວະກາດຂອງອາເມຣິກາ ແລະ ຈີນ ກໍາລັງຫາລືກັນກ່ຽວກັບຄວາມຮ່ວມມືດ້ານການສໍາຫຼວດດວງຈັນ ຫຼັງຍານ “ສາງເອີ໋-4” ຂອງຈີນ ສາມາດລົງຈອດໃນເຂດພື້ນທີ່ຫ່າງໄກຂອງດວງຈັນໄດ້ສໍາເລັດເມື່ອຕົ້ນເດືອນ ຜ່ານມານີ້.

ສໍານັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດສະຫະລັດ ອາເມຣິກາ ເມື່ອວັນເສົາ ທີ 19 ມັງກອນ ວ່າ ອົງການບໍລິຫານການບິນ ແລະ ອາວະກາດແຫ່ງຊາດຂອງອາເມຣິກາ (NASA: National Aeronautics and Space Administration) ອອກຖະແຫຼງການ ເມື່ອວັນສຸກ ວ່າ ໄດ້ຮັບການອະນຸມັດຈາກສະພາຄອງເກຣສ ໃຫ້ປະສານຄວາມຮ່ວມມືດ້ານໂຄງການສໍາຫຼວດດວງຈັນ ກັບ ອົງການບໍລິຫານອາວະກາດແຫ່ງຊາດຈີນ (CNSA: China National Space Administration) ເຊິ່ງສົ່ງຍານ “ສາງເອີ໋-4” ທີ່ສາມາດໄປລົງຈອດບໍລິເວນຂົ້ວໃຕ້ ເຊິ່ງເປັນພື້ນທີ່ຫ່າງໄກ ຫຼື ດ້ານມືດ ຂອງດວງຈັນ ໄດ້ສໍາເລັດ ພ້ອມປ່ອຍຍານຫຸ່ນຍົນ ຍະວີ່ທູ່-2 ຫຼື ກະຕ່າຍຫຍົກ-2 ອອກສໍາຫຼວດ ແລະ ຍານທັງສອງລໍາຍັງຮ່ວມກັນບັນທຶກທັງຮູບພາບ ແລະ ພາບເຄື່ອນໄຫວ ສົ່ງກັບມາຖານບັນຊາການທີ່ໂລກຢ່າງຕໍ່ເນື່ອງ ສ້າງປະວັດສາດເປັນວັດຖຸທີ່ສ້າງຂຶ້ນໂດຍມະນຸດອັນທໍາອິດທີ່ສາມາດລົງຈອດ ແລະ ສໍາຫຼວດບໍລິເວນ ດັ່ງກ່າວໄດ້ສໍາເລັດ.

ไม่มีคำอธิบายรูปภาพ
ຍານສາງເອີ໋-4
ในภาพอาจจะมี สถานที่กลางแจ้ง
ຫຸ່ນຍົນ ຍະວີ່ທູ່-2

ທັງນີ້ ຖ້າບໍ່ມີການປ່ຽນແປງຫຍັງ ຫຸ່ນຍົນສໍາຫຼວດດວງຈັນຂອງນາຊາ ໃນຊື່ Lunar Reconnaissance Orbiter : LRO ເຊິ່ງອອກເດີນທາງຈາກໂລກ ເມື່ອເດືອນມິຖຸນາ 2009 ໄດ້ຮັບອະນຸຍາດຈາກ CNSA ໃຫ້ບັນທຶກພາບຈຸດລົງຈອດຂອງຍານສາງເອີ໋-4 ໃນວັນທີ 31 ມັງກອນ ນີ້ ໂດຍ ນາຊາ ຢືນຢັນ ວ່າ ຈະເຜີຍແຜ່ຂໍ້ມູນທີ່ໄດ້ມາໃຫ້ສາທາລະນະຊົນໄດ້ຮັບຊາບ ເພື່ອຄວາມໂປ່ງໃສ ແລະ ເພື່ອຜົນປະໂຫຍດດ້ານການຮ່ວມມືໃນວຽກງານວິໄຈກ່ຽວກັບດວງຈັນຮ່ວມກັນ ລະຫວ່າງ ອາເມຣິກາ ກັບ ຈີນ ໂດຍຍານ LRO ເຄີຍໂຄຈອນຜ່ານບໍລິເວນລົງຈອດຂອງຍານສາງເອີ໋-3 ແລະ ບັນທຶກພາບມາແລ້ວເມື່ອປີ 2013 ຫຼັງໄດ້ຮັບອະນຸຍາດຈາກທາງການຈີນ.

ຂະນະດຽວກັນ ມີລາຍງານດ້ວຍວ່າ ນາຊາ ກໍາລັງເຈລະຈາກັບ CNSA ກ່ຽວກັບ ຄວາມເປັນໄປໄດ້ ໃນການຕິດຕັ້ງອຸປະກອນລະບຸພິກັດເທິງຍານສາງເອີ໋-4 ແລະ ຈີນສາມາດໃຊ້ວຽກອຸປະກອນຕົວນີ້ຮ່ວມກັນໄດ້ດ້ວຍ ຢ່າງໃດກໍ່ຕາມ ຂໍ້ສະຫຼຸບຂອງປະເດັນນີ້ຍັງບໍ່ເປັນທີ່ຊັດເຈນເທື່ອ.