ສິງກະໂປ ສັ່ງຊື້ ເອັຟ-35 ກັບ ອາເມຣິກາ ມາປະຈຳການແທນ ຝູງເອັຟ-16

291

ຫຼັງຈາກພິຈາລະນາ 3 ທາງເລືອກ ໃນການຊື້ຍົນຮົບ ລຸ້ນໃໝ່ຂອງອາເມຣິກາ, ເອີຣົບ ແລະ ຈີນ ໃນທີ່ສຸດລັດຖະບານສິງກະໂປຕັດສິນໃຈສັ່ງຊື້ ເອັຟ-35 ຂອງອາເມຣິກາ ເພື່ອທົດແທນຝູງຍົນເອັຟ-16 ທີ່ກຽມປົດປະຈຳການຫຼັງປີ 2030.

ສໍານັກຂ່າວຣອຍເຕີ ແລະ ເອເອັຟພີ ລາຍງານຈາກປະເທດສິງກະໂປ ເມື່ອວັນສຸກ ທີ 18 ມັງກອນ ວ່າ ສິງກະໂປ ເຊິ່ງເປັນໜຶ່ງໃນປະເທດທີ່ມີກອງທັບ, ອາວຸດທີ່ທັນສະໄໝ ແລະ ດີທີ່ສຸດໃນອາຊີ ແລະ ມີງົບປະມານສຳລັບກອງທັບຫຼາຍທີ່ສຸດ ໃນອາຊີຕາເວັນອອກສຽງໃຕ້ ເປີດເຜີຍກ່ອນໜ້ານີ້ ວ່າ ກຳລັງພິຈາລະນາປຽບທຽບຍົນຮົບລຸ້ນໃໝ່ ທີ່ຈະຊື້ເຂົ້າມາປະຈຳການກອງທັບອາກາດ ລະຫວ່າງ ເອັຟ-35  ຂອງບໍລິສັດລັອກຮີດ ມາຕິນ ຂອງອາເມຣິກາ, ຢູໂຣ ໄຟເຕີ ໄຕ້ຝຸ່ນ ຂອງເອີຣົບ ແລະ ເສິງຕູ ເຈ-20 ຂອງຈີນ.

ຖະແຫຼງການຂອງກະຊວງປ້ອງກັນປະເທດສິງກະໂປ ເມື່ອວັນສຸກ ຜ່ານມາ ກ່າວວ່າ “ຝູງຍົນຮົບເອັຟ-16 ມີແຜນປົດປະຈໍາການໃນອີກບໍ່ດົນ ແລະ ເອັຟ-35 ຈອຍ ສະໄຕຣຄ໌ ໄຟເຕີ ຄືຕົວແທນທີ່ເໝາະສົມທີ່ສຸດທີ່ຈະຮັກສາຂີດຄວາມສາມາດຂອງກອງທັບອາກາດສິງກະໂປ”.

ປັດຈຸບັນ ກອງທັບອາກາດສິງກະໂປມີຍົນຮົບລຸ້ນເອັຟ-16 ຢູ່ປະມານ 60 ລໍາ ເຂົ້າປະຈໍາການ ໃນປີ 2008 ແລະ ຈະປົດປະຈໍາການບໍ່ດົນຫຼັງປີ 2030.

ທ່ານ Ng Eng Hen ລັດຖະມົນຕີປ້ອງກັນປະເທດສິງກະໂປ ໄດ້ຂຽນຂໍ້ຄວາມລົງ ເຟສບຸ໊ກ ວ່າ ກະຊວງປ້ອງກັນປະເທດສິງກະໂປຕັດສິນໃຈເລືອກ ເອັຟ-35 ແຕ່ຂັ້ນຕົ້ນສັ່ງຊື້ບໍ່ເທົ່າໃດລຳກ່ອນ ເພື່ອປະເມີນຂີດຄວາມສາມາດຢ່າງເຕັມທີ່ ກ່ອນຕັດສິນໃຈຊື້ເປັນຝູງຕາມແຜນທີ່ກຳນົດ ກະຊວງປ້ອງກັນປະເທດສິງກະໂປຈະນັດຫາລືກັບຕົວແທນກະຊວງປ້ອງກັນປະເທດອາເມຣິກາ ເຊິ່ງຄາດວ່າຕ້ອງໃຊ້ເວລາປະມານ 9-12 ເດືອນ ສໍາລັບການສະຫຼຸບເງື່ອນໄຂຂໍ້ຕົກລົງເບື້ອງຕົ້ນ.

ในภาพอาจจะมี ท้องฟ้า, เมฆ และสถานที่กลางแจ้ง

ເອັຟ-35 ເປັນໜຶ່ງໃນຍົນຮົບທີ່ມີຄວາມທັນສະໄໝລ້ຳໜ້າທີ່ສຸດໃນໂລກ ຄອບຄອງສ່ວນແບ່ງປະມານ 25% ຂອງລາຍໄດ້ບໍລິສັດລັອກຮີດທັງໝົດ ລາຄາລຸ້ນທໍາມະດາຂອງ ເອັຟ-35 ເອ ຕົກລຳລະປະມານ 90 ລ້ານໂດລາ (ປະມານ 770 ຕື້ກີບ) ລາຄາສູງ-ຕ່ຳແມ່ນຂຶ້ນຢູ່ກັບການເຈລະຈາຕໍ່ລອງກັບກະຊວງປ້ອງກັນປະເທດອາເມຣິກາ.

ແຫຼ່ງຂ່າວ: nst, reuters