ສຽວແທນ! ນັກດໍານ້ຳຖ່າຍຮູບກັບ ສະຫຼາມຂາວ ນອກຊາຍຝັ່ງເກາະຮາວາຍ

249

ນັກດໍານ້ຳທີມໜຶ່ງໄດ້ມີໂອກາດລອຍເຂົ້າໃກ້ ແລະ ສາມາດສໍາຜັດກັບປາສະຫຼາມຂາວຂະໜາດໃຫຍ່ບໍລິເວນນອກຊາຍຝັ່ງລັດຮາວາຍ ຂອງປະເທດອາເມຣິກາ ແລະ ໜ້າຈະເປັນໜຶ່ງໃນປາສະຫຼາມຂາວ ຂະໜາດໃຫຍ່ທີ່ສຸດທີ່ຍັງມີຊີວິດຢູ່ໃນໂລກດ້ວຍ.

ສໍານັກຂ່າວຕ່າງປະເທດລາຍງານຈາກນະຄອນລອສແອນເຈລິສ ປະເທດສະຫະລັດ ອາເມຣິກາ ເມື່ອວັນພະຫັດ ທີ 17 ມັງກອນ ໂດຍອ້າງຈາກລາຍງານຂອງໜັງສືພິມ ເດິ ໂຮໂນລູລູ ສະຕາຣ໌-ແອັດເວີໄທເຊີ ເຊິ່ງເປັນໜັງສືພິມລາຍວັນ ຄ້າຍໃຫຍ່ທີ່ສຸດຂອງລັດຮາວາຍ ໄດ້ເຜີຍແຜ່ຮູບພາບ ທີ່ບັນທຶກໂດຍທີມນັກດໍານ້ຳອິດສະຫຼະເປັນຮູບປາສະຫຼາມຂາວ ຂະໜາດໃຫຍ່ ທີ່ມີການປະເມີນອາຍຸໄວ້ຢ່າງໜ້ອຍ 50 ປີ ຄວາມຍາວຂອງລໍາຕົວເກືອບ 6 ແມັດ ແລະ ນໍ້າໜັກປະມານ 25 ໂຕ້ນ ເຊິ່ງອາດຈະເປັນໜຶ່ງໃນປາສະຫຼາມຂາວຕົວໃຫຍ່ທີ່ສຸດໃນໂລກດ້ວຍ ໂດຍທີມນັກດໍານ້ຳພົບກັບສະຫຼາມດັ່ງກ່າວ ບໍລິເວນນອກຊາຍຝັ່ງຂອງເກາະໂອວາຮູ ທີ່ເປັນເກາະຂະໜາດໃຫຍ່ ອັນດັບ 3 ຂອງໝູ່ເກາະຮາວາຍດ້ວຍ.

ທັງນີ້ ນາງ ໂອຊຽນ ແຣມຊີ ໜຶ່ງໃນທີມນັກດໍານ້ຳ ກ່າວວ່າ ຕົນເອງ ແລະ ເພື່ອນ ສັນນິດຖານ ວ່າ ປາສະຫຼາມຂາວຕົວນີ້ ອາດຈະເປັນຕົວດຽວກັນກັບທີ່ນັກວິທະຍາສາດອີກທີມໜຶ່ງພະຍາຍາມຕິດຕາມມາດົນກວ່າ 20 ປີ ແລະ ຕັ້ງຊື່ ໄວ້ວ່າ “ດີບ ບລູ (Deep Blue)” ໂດຍເປັນເພດເມຍ ແລະ ອາດຈະກໍາລັງມີລູກຢູ່ໃນທ້ອງດ້ວຍ ພ້ອມທັງມັນຍັງມີທ່າທີເປັນມິດຫຼາຍກວ່າທີ່ຄິດ ດ້ວຍການລອຍມາໃກ້ເຮືອຂອງທີມນັກດໍານ້ຳເກືອບໝົດມື້.

ຂະນະດຽວກັນ ນາງ ແຣມຊີ ໃຫ້ຂໍ້ມູນດ້ວຍວ່າ ທຸກສາຍພັນຈະໂຈມຕີມະນຸດກໍ່ຕໍ່ເມື່ອມະນຸດສະແດງທ່າທີໃຫ້ພວກມັນຮູ້ສຶກໄດ້ເຖິງ “ຄວາມຜິດປົກກະຕິ” ຫຼື “ຮູ້ສຶກບໍ່ໄວ້ໃຈ” ແລະ ການພົບສະຫຼາມຂາວ ໃນທະເລແຖວຮາວາຍແມ່ນເປັນເຫດການທີ່ເກີດຂຶ້ນຍາກຫຼາຍ ເພາະອຸນຫະພູມຂອງນ້ຳໃນເຂດນີ້ຂ້ອນຂ້າງອຸ່ນ ແຕ່ສະຫຼາມຂາວທົ່ວໄປມັກອາໄສໃນສະພາບນ້ຳທີ່ເຢັນກວ່ານີ້.