ໂຄງການຂົວມິດຕະພາບ ລາວ – ໄທ ແຫ່ງທີ 5 ຈະເລິ່ມກໍ່ສ້າງກາງປີນີ້

276

ຄວາມຄືບໜ້າຂອງໂຄງການກໍ່ສ້າງຂົວມິດຕະພາບ ແຫ່ງທີ 5 ( ປາກຊັນ – ບຶງການ ) ພາຍຫຼັງທີ່ກອງປະຊຸມໃນເດືອນມິຖຸນາ 2018 ຜ່ານມາ ທັງສອງຝ່າຍ ລາວ – ໄທ ໄດ້ຕົກລົງເປັນເອກະພາບກັນຫາກບໍ່ມີການຄາດເຄື່ອນ ຄາດວ່າໃນເດືອນມີນາ 2019 ຈະໄດ້ເລີ່ມລົງມືກໍ່ສ້າງ ໂດຍກໍານົດເອົາຮູບແຄນເປັນສັນຍະລັກຮູບເສົາກາງນ້ຳ ເຊິ່ງມີມູນຄ່າກໍ່ສ້າງ 3.930 ລ້ານບາດ, ມາຮອດປັດຈຸບັນ ລັດຖະບານລາວ ກໍາລັງພິຈາລະນາເລື່ອງງົບປະມານຢູ່ ຄາດວ່າອາດຈະໄດ້ລົງມືຈັດຕັ້ງປະຕິບັດໃນກາງຫາທ້າຍປີນີ້.
ຜູ້ປະສານງານໂຄງການກໍ່ສ້າງຂົວມິດຕະພາບ ແຫ່ງທີ 5 ກະຊວງໂຍທາທິການ ແລະ ຂົນສົ່ງ ໃຫ້ສໍາພາດທາງໂທລະສັບວ່າ: ແຜນສ້າງຂົວມິດຕະພາບ ລາວ – ໄທ ແຫ່ງທີ 5 ລະຫວ່າງປາກຊັນ – ບຶງການ ແມ່ນແນໃສ່ອຳນວຍຄວາມສະດວກການເຊື່ອມໂຍງທາງດ້ານຄົມມະນາຄົມຂົນສົ່ງ, ຊຸກຍູ້ການຄ້າ ແລະ ການລົງທຶນທີ່ລັດຖະບານທັງສອງຝ່າຍຕົກລົງກັນ ເຊິ່ງຕາມການເຫັນດີໃນກອງປະຊຸມ ຄັ້ງວັນທີ 6 ເດືອນມິຖຸນາ 2018 ຜ່ານມາ ຢູ່ທີ່ຈັງຫວັດໜອງຄາຍ ປະເທດໄທ ຖ້າຫາກບໍ່ມີການຄາດເຄື່ອນກໍຄາດວ່າໃນເດືອນມີນາ 2019 ໄດ້ເລີ່ມລົງມືກໍ່ສ້າງ.

ທ່ານກ່າວຕື່ມວ່າ: ແຕ່ພາຍຫຼັງທີ່ກອງປະຊຸມປຶກສາຫາລືຂອງກະຊວງທີ່ກ່ຽວຂ້ອງ ໃນເດືອນສິງຫາ 2018 ຜ່ານມາ ໄດ້ເວົ້າເລື່ອງແຜນງົບປະມານຍັງບໍ່ທັນລົງຕົວເທື່ອ ເນື່ອງຈາກຜູ້ໃຫ້ທຶນກໍຄືອົງການຮ່ວມມືເພື່ອການພັດທະນາເສດຖະກິດກັບປະເທດເພື່ອນບ້ານ ຫຼື ນີດາ ( NEDA ) ໄດ້ເພີ່ມງົບປະມານ 80 ລ້ານບາດ ໃນສ່ວນຂອງບ້ວງເງິນບໍລິຫານ ແລະ ເງິນແຮ 5% ຈາກເດີມ 1.300 ລ້ານບາດ ມາເປັນ 1.380 ລ້ານບາດ ເຊິ່ງພາກສ່ວນກ່ຽວຂ້ອງໄດ້ສະເໜີກະຊວງການເງິນ ແລະ ກະຊວງການເງິນ ກໍໄດ້ສະເໜີຕໍ່ລັດຖະບານເພື່ອຄົ້ນຄວ້າພິຈາລະນາ.
ມາເຖິງວັນທີ 4 – 5 ມັງກອນ 2019 ຜ່ານມານີ້ ກະຊວງໂຍທາທິການ ແລະ ຂົນສົ່ງ ກໍໄດ້ລາຍງານຕໍ່ລັດຖະບານ ເຊິ່ງຕອນນີ້ກໍຍັງລໍຖ້າເພິ່ນມີຄໍາເຫັນແນວໃດຕື່ມ ລວມທັງການພິຈາລະນາເລື່ອງສັນຍາກູ້ຢືມເງິນຈາກອົງການ ນີດາ. ທັງນີ້, ກໍເພື່ອໃຫ້ສອດຄ່ອງ ແລະ ເປັນໄປຕາມລະບຽບຫຼັກການ.
ຂໍ້ມູນຈາກພະແນກໂຍທາທິການ ແລະ ຂົນສົ່ງ ແຂວງບໍລິຄຳໄຊ ຍັງເປີດເຜີຍຕື່ມວ່າ: ໂຄງການກໍ່ສ້າງຂົວມິດຕະພາບ ລາວ – ໄທ ແຫ່ງທີ 5 ( ປາກຊັນ – ບຶງການ ) ທາງຂັ້ນເທິງໄດ້ມີການຕົກລົງເຫັນດີເປັນທີ່ຮຽບຮ້ອຍ ຍັງແຕ່ກຽມລົງມືການກໍ່ສ້າງເທົ່ານັ້ນ ເຊິ່ງກວມເອົາເນື້ອທີ່ກໍ່ສ້າງປະມານ 78 ເຮັກຕາ ( ແລວຂົວ, ແລວທາງທັງສອງຂ້າງ ແລະ ບໍລິເວນອາຄານດ່ານ ). ນອກນັ້ນ, ຍັງມີເນື້ອທີ່ໄວ້ສໍາລັບການລົງທຶນຂອງບໍລິສັດເອກະຊົນຕື່ມອີກ ຈຳນວນ 109 ເຮັກຕາ ເຊິ່ງຈຸດທີ່ຕັ້ງຂອງຂົວຂ້າມນ້ຳຂອງມິດຕະພາບ ລາວ – ໄທ ແຫ່ງທີ 5 ແມ່ນຕັ້ງຢູ່ເຂດບ້ານກ້ວຍອຸດົມ ຫ່າງຈາກເທສະບານແຂວງບໍລິຄຳໄຊ ມາທາງທິດເໜືອຕາມທາງເລກ 13 ໃຕ້ປະມານ 10 ກິໂລແມັດ ແລະ ຈາກທາງເລກ 13 ໃຕ້ ເຂົ້າໄປຫານ້ຳຂອງ ປະມານ 2,5 ກິໂລແມັດ.

ກ່ອນໜ້ານັ້ນຂໍ້ມູນຂອງໂຄງການ ຍັງໃຫ້ຮູ້ອີກວ່າ: ຂົວດັ່ງກ່າວແມ່ນມູນຄ່າການກໍ່ສ້າງທັງໝົດ 3.930 ລ້ານບາດ ຫຼື ປະມານ 1 ພັນຕື້ກວ່າກີບ. ໃນນັ້ນ, ວຽກທາງເຊື່ອມຕໍ່ເບື້ອງໄທ 1.340 ລ້ານບາດ, ອາຄານດ່ານ 610 ລ້ານບາດ, ກໍ່ສ້າງຂົວ 680 ລ້ານບາດ ລວມເປັນ 2.630 ລ້ານບາດ ປະມານ 680 ຕື້ກີບ; ສ່ວນເບື້ອງລາວ ມູນຄ່າການກໍ່ສ້າງທາງເຊື່ອມຕໍ່ 370 ລ້ານບາດ, ອາຄານດ່ານ 440 ລ້ານບາດ, ມູນຄ່າກໍ່ສ້າງຂົວ 490 ລ້ານບາດ ລວມທັງໝົດ 1.300 ລ້ານບາດ ປະມານ 340 ຕື້ກີບ.
ສຳລັບຮູບຊົງສັນຍະລັກໜ້າອາຄານດ່ານຂອງລາວ ຜ່ານການປະສານສົມທົບກັບອຳນາດການປົກຄອງແຂວງບໍລິຄຳໄຊ ແລະ ຄະນະຄົ້ນຄວ້າ ຈຶ່ງໄດ້ຕົກລົງເປັນເອກະພາບກັນເລືອກເອົາສັນຍະລັກເປັນໂຕເສົາລາ 3 ໂຕ ( ໂຕຜູ້, ໂຕແມ່ ແລະ ລູກ ) ຢູ່ເທິງແຖ່ນ ຫຼື ເດີ່ນຫຍ້າຕໍ່ໜ້າອາຄານດ່ານ ເນື່ອງຈາກວ່າໂຕເສົາລາ ເປັນສັດທີ່ຫາຍາກ ແລະ ມີຖິ່ນອາໄສ ເຊິ່ງພົບເຫັນຢູ່ແຂວງບໍລິຄຳໄຊ ເທົ່ານັ້ນ ໃນ ສປປ ລາວ ແລະ ສ່ວນຮູບຊົງສັນຍະລັກປະຕູເມືອງແມ່ນກຳນົດເອົາຈອມທາດພະບາດໂພນສັນ ມາໃສ່ເປັນສັນຍະລັກ.

CR:Laoedaily