ລູກສາວ ທຣຳ ມີຊື່ຢູ່ໃນບັນຊີພິຈາລະນາເປັນປະທານທະນາຄານໂລກຄົນໃໝ່

272

ເດິ ໄຟແນນຊຽວ ໄທມ໌ ລາຍງານ ວ່າ ນາງ ອິວັງກ້າ ລູກສາວຂອງປະທານາທິບໍດີສະຫະລັດມີຊື່ປະກົດຢູ່ໃນລາຍການພິຈາລະນາສະເໜີຊື່ ໂດຍລັດຖະບານວໍຊິງຕັນໃຫ້ດໍາລົງຕໍາແໜ່ງປະທານທະນາຄານໂລກຄົນໃໝ່.

ສໍານັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດສະຫະລັດອາເມຣິກາ ເມື່ອວັນສຸກ ທີ 11 ມັງກອນ ໂດຍອ້າງຈາກລາຍງານຂອງໜັງສືພິມ “ເດິ ໄຟແນນຊຽວ ໄທມ໌” ວ່າ ລັດຖະບານຂອງປະທານາທິບໍດີໂດນັລ ທຣຳ ກໍາລັງພິຈາລະນາລາຍຊື່ບຸກຄົນຫຼາຍຄົນ ເຊິ່ງອາດມີຄຸນສົມບັດເໝາະສົມທີ່ຈະໄດ້ຮັບການສະເໜີຊື່ໃຫ້ດໍາລົງຕໍາແໜ່ງປະທານທະນາຄານໂລກ (ເວີດແບັງ) ຄົນຕໍ່ໄປແທນທ່ານ ຈິມ ຢອງ-ຄິມ ເຊິ່ງສ້າງຄວາມຕົກຕະລຶງໃຫ້ກັບທຸກຝ່າຍດ້ວຍການປະກາດຂໍລາອອກຈາກຕໍາແໜ່ງ ເມື່ອອາທິດທີ່ຜ່ານມາ ໂດຍຈະມີຜົນທັນທີ ໃນວັນທີ 1 ກຸມພາ ນີ້ ກ່ອນຄົບວາລະການດໍາລົງຕໍາແໜ່ງສະໄໝ ທີ 2 ດົນເຖິງ 3 ປີ ກາຍເປັນກະແສຂ່າວຄວາມຂັດແຍ້ງກັບ ທຣຳ ໃນເລື່ອງຂອງນະໂຍບາຍສິ່ງແວດລ້ອມ.

ທັງນີ້ ເດິ ໄຟແນນຊຽວ ໄທມ໌ ລາຍງານດ້ວຍວ່າ ໃນບັນດາບຸກຄົນທີ່ “ໜ້າສົນໃຈ” ທີ່ຢູ່ໃນລາຍຊື່ລວມເຖິງ ນາງນິກກີ້ ເຮລີ ອະດີດເອກອັກຄະລາຖະທູດສະຫະລັດ ປະຈໍາສະຫະປະຊາຊາດ (UN) ແລະ ນາງ ອິວັງກ້າ ທຣຳ ລູກສາວກົກຂອງຜູ້ນໍາສະຫະລັດ ເຊິ່ງກາຍເປັນການສ້າງປະເດັນ “ລະບອບອຸປະຖໍາ” ຫຼື “ລະບອບພີ່ນ້ອງສະຫາຍ” ຈາກການທີ່ຜູ້ເປັນພໍ່ (ທຣຳ) ແຕ່ງຕັ້ງໃຫ້ລູກສາວ ແລະ ຜົວ ຄື ທ້າວ ຈາເຣັດ ຄຸຊເນີ ຂຶ້ນດໍາລົງຕໍາແໜ່ງທີ່ປຶກສາປະຈໍາທຳນຽບຂາວ ເມື່ອເດືອນມີນາ 2017 ເຮັດໃຫ້ເກີດມີສຽງວິພາກວິຈານຢ່າງໜັກຈາກຫຼາຍຝ່າຍ ເຖິງວ່າທັງສອງຄົນຢືນຢັນວ່າ ບໍ່ໄດ້ຮັບຄ່າຕອບແທນໃດກໍຕາມ.

ນອກຈາກນີ້, ກ່ອນໜ້ານັ້ນ ຍັງມີລາຍງານວ່າຜູ້ນໍາສະຫະລັດ ອາດສະເໜີຊື່ລູກສາວກົກໃຫ້ຮັບຕໍາແໜ່ງເອກອັກຄະລາຖະທູດ ປະຈໍາຍູເອັນແທນນາງ ເຮລີ ດ້ວຍ ເຊິ່ງ ນາງ ອິງວັງກ້າ ອອກມາປະຕິເສດທັນທີໂດຍຢືນຢັນວ່າ ບຸກຄົນທີ່ຈະມາຮັບຕໍາແໜ່ງແທນ ນາງ ເຮລີ ນັ້ນ “ຕ້ອງບໍ່ແມ່ນຕົນ” ເຊິ່ງຕໍ່ມາ ໂດນັລ ທຣຳ ໄດ້ສະເໜີຊື່ ນາ ງຮິດເທີ ເນົາເອີດ ໂຄສົກຍິງຂອງກະຊວງການຕ່າງປະເທດໃຫ້ເຂົ້າຮັບການພິຈາລະນາແທນ.