ອາເມຣິກາ “ຕັ້ງເງື່ອນໄຂ” ກ່ອນຖອນທະຫານອອກຈາກຊີເຣຍ

318

ທີ່ປຶກສາດ້ານຄວາມໝັ້ນຄົງຂອງທຳນຽບຂາວ ກ່າວວ່າ ອາເມຣິກາ “ຕ້ອງການຄວາມໝັ້ນໃຈ” ຈາກທຸກຝ່າຍທີ່ກ່ຽວຂ້ອງວ່າສະຖານະຂອງກອງກໍາລັງຊາວເຄີດໃນຊີເຣຍ “ຈະປອດໄພ” ກ່ອນການຖອນທະຫານ ແລະ ກຸ່ມໄອເອັສ ແພ້ສົງຄາມຢ່າງໝົດສະພາບ.

ສໍານັກຂ່າວຕ່າງປະເທດລາຍງານຈາກນະຄອນຫຼວງເທລອາວີບ ປະເທດອິສຣາເອລ ເມື່ອວັນຈັນ ທີ 7 ມັງກອນ ວ່າ ສືບເນື່ອງຈາກການທີ່ປະທານາທິບໍດີໂດນັລ ທຣຳ ປະກາດ ເມື່ອວັນທີ 19 ທັນວາ ປີທີ່ຜ່ານມາ ເລື່ອງການຖອນທະຫານອາເມຣິກັນ “ທີ່ມີຢູ່ທັງໝົດປະມານ 2.000 ຄົນ ອອກຈາກປະເທດຊີເຣຍ ພາຍໃນໄລຍະເວລາ 30 ວັນ ກ່ອນທີ່ອີກ 2 ອາທິດຕໍ່ມາ ໃຊ້ຄໍາວ່າ “ຄ່ອຍເປັນຄ່ອຍໄປ” ແລະ ຂະຫຍາຍຂອບໄລຍະເວລາ ເປັນ 120 ວັນ ທ່ານ ຈອນ ໂບຕັນ ທີ່ປຶກສາດ້ານຄວາມໝັ້ນຄົງປະຈໍາທຳນຽບຂາວກ່າວລະຫວ່າງການຢ້ຽມຢາມອິສຣາເອລ ເມື່ອວັນອາທິດ ວ່າ ເຖິງການຖອນທະຫານຕ້ອງເກີດຂຶ້ນຕາມຄໍາສັ່ງຂອງຜູ້ນໍາອາເມຣິກາ ແຕ່ຈະຕ້ອງຕັ້ງຢູ່ເທິງເງື່ອນໄຂທີ່ວ່າ “ກຸ່ມໄອເອັສ ເປັນຝ່າຍແພ້ສົງຄາມແບບໝົດສະພາບ” ຈົນບໍ່ສາມາດຟື້ນຕົວກັບມາເປັນໄພຄຸກຄາມໄດ້ອີກ.

ຂະນະດຽວກັນ ອາເມຣິກາຕ້ອງການການຢືນຢັນ “ຄວາມປອດໄພ” ໃຫ້ກັບກອງກໍາລັງປ້ອງກັນຕົນເອງຊາວເຄີດ (YPG:  People’s Protection Units or People’s Defense Units) ທີ່ປັດຈຸບັນກໍາລັງຢຶດຄອງພື້ນທີ່ທາງພາກເໜືອຂອງຊີເຣຍ ແລະ ອາດມີການຄຶງກໍາລັງທະຫານໄວ້ບາງສ່ວນກ່ອນ ເພື່ອປ້ອງກັນກິດຈະກໍາທາງທະຫານຂອງອິຣານໃນພື້ນທີ່ ໂດຍ ທ່ານ ໂບຕັນ ກ່າວວ່າ ຈະຫາລືເລື່ອງນີ້ກັບປະທານາທິບໍດີເລເຊບ ເທຢິບ ເອີໂດກັນ ລະຫວ່າງການຢ້ຽມຢາມປະເທດຕັວກກີດ້ວຍ ເຊິ່ງລັດຖະບານອັງກາຣາ ປະກາດລ່ວງໜ້າມາໄລຍະໜຶ່ງແລ້ວວ່າ ກຽມປະຕິບັດການທາງທະຫານຝ່າຍດຽວ ໃນເຂດພາກເໜືອຂອງຊີເຣຍ ເພື່ອກວດລ້າງກຸ່ມ YPG ທີ່ຖືເປັນ “ສ່ວນໜຶ່ງ” ຂອງພັກຄົນງານເຄີດິສຖານ (PKK:  Kurdistan Workers’ Party) ເຊິ່ງສູ້ຮົບກັບ ກອງທັບຕັວກກີມາດົນກວ່າ 3 ທົດສະວັດ ເພື່ອແບ່ງແຍກດິນແດນບາງສ່ວນທາງພາກໃຕ້ຂອງປະເທດ.

ในภาพอาจจะมี 2 คน, ผู้คนกำลังยืน
ທ່ານ ຈອນໂບຕັນ (ຊ້າຍ) ແລະ ນາຍົກລັດຖະມົນຕີເບນຈາມິນ ເນທັນຢາຮູ (ຂວາ)

ທັງນີ້ ຄໍາກ່າວຂອງ ທ່ານ ໂບຕັນ ຖືເປັນການສົ່ງສັນຍານ ເຊິ່ງສື່ຄວາມໝາຍໄດ້ວ່າ ການຖອນທະຫານອາເມຣິກັນອອກຈາກຊີເຣຍ “ອາດຫຼ້າຊ້າອອກໄປອີກ” ດ້ານທ່ານນາຍົກລັດຖະມົນຕີເບນຈາມິນ ເນທັນຢາຮູ ໃຫ້ຄວາມສໍາຄັນກັບປະເດັນຂອງພື້ນທີ່ຮາບສູງໂກລັນຫຼາຍກວ່າ ໂດຍກ່າວວ່າ ລັດຖະບານເທລອາວີບ ຈະໃຊ້ໂອກາດນີ້ ພະຍາຍາມອີກຄັ້ງ ໃນການໃຫ້ອາເມຣິກາຍອມຮັບພື້ນທີ່ອານາເຂດທັງໝົດຂອງຮາບສູງແຫ່ງນີ້ ເປັນຂອງອິສຣາເອລ.

ອີກປະການໜຶ່ງ ພື້ນທີ່ຮາບສູງໂກລັນ ເຊິ່ງມີອານາເຂດ 1.800 ຕາລາງກິໂລແມັດ ຕັ້ງຢູ່ລະຫວ່າງກາງເຂດແດນຝັ່ງຕາເວັນຕົກຂອງປະເທດຊີເຣຍ ກັບ ຝັ່ງຕາເວັນອອກຂອງປະເທດອິສຣາເອລ ແຕ່ອິສຣາເອລຢຶດຄອງພື້ນທີ່ 1.200 ຕາລາງກິໂລລແມັດ ຫຼັງຊະນະສົງຄາມອາຣັບ-ອິສຣາເອລ ຫຼື ສົງຄາມ 6 ວັນ ເມື້ອປີ 1967 ເຫຼືອພື້ນທີ່ໃຫ້ຊີເຣຍພຽງ 600 ຕາລາງກິໂລແມັດ ຢ່າງໃດກໍ່ຕາມ ສະຫະປະຊາຊາດ (UN) ບໍ່ເຄີຍຮັບຮອງການຢຶດຄອງພື້ນທີ່ຮາບສູງໂກລັນຂອງອິສຣາເອລ ນອກຈາກນີ້ ທ່ານ ເນທັນຢາຮູ ເຄີຍຂໍໃຫ້ ໂດນັລ ທຣຳ ຊ່ວຍຮັບຮອງພື້ນທີ່ຮາບສູງໂກລັນ ມາແລ້ວຄັ້ງໜຶ່ງ ເມື່ອປີ 2017 ແຕ່ຜູ້ນໍາອາເມຣິກາຍັງບໍ່ຕອບຮັບ ຫຼື ປະຕິເສດ.