ທ່ານ ສີ ຈິ້ນຜິງ ສັ່ງກອງທັບເພີ່ມຄວາມພ້ອມສໍາລັບທຸກສະຖານະການ

330

ປະທານປະເທດຈີນຂໍໃຫ້ກອງທັບປັບປຸງຄວາມພ້ອມ ໃນການຮັບມືກັບສະຖານະການ “ທຸກຮູບແບບ” ບໍ່ວ່າຈະກ່ຽວຂ້ອງກັບການທະຫານໂດຍກົງ ຫຼື ບໍ່ກໍຕາມ.

ສໍານັກຂ່າວຕ່າງປະເທດລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນເສົາ ທີ 5 ມັງກອນ ວ່າ ປະທານປະເທດ ສີ ຈິ້ນຜິງ ໃນຖານະປະທານຄະນະກຳມາທິການທະຫານສ່ວນກາງຂອງຈີນ (ຊີເອັມຊີ) ກ່າວລະຫວ່າງການປະຊຸມກັບບັນດາຜູ້ນໍາກອງທັບ ເມື່ອວັນສຸກ ທີ່ຜ່ານມາ ຂໍໃຫ້ຜູ້ບັນຊາການທຸກກອງກຳລັງເພິ່ມຄວາມກະຕຸນຜູ້ທີ່ຢູ່ພາຍໃຕ້ການບັນຊາການໃຫ້ມີ “ຄວາມຕື່ນຕົວ” ແລະ ຄວາມກະຕືລືລົ້ນຕໍ່ “ສະຖານະການສຸກເສີນທຸກຮູບແບບ” ບໍ່ວ່າຈະເປັນຄວາມຂັດແຍ່ງທາງທະຫານ, ການສູ້ຮົບ, ວິກິດ ແລະ ຄວາມຍາກລຳບາກທຸກຮູບແບບ, ພ້ອມທັງການປະຕິຮູບແຜນຍຸດທະສາດທາງການທະຫານ ເພື່ອໃຫ້ທັນກັບຍຸກສະໄໝປັດຈຸບັນ ທີ່ກໍາລັງກ້າວເຂົ້າສູ່ການປ່ຽນແປງຄັ້ງໃຫຍ່ທີ່ສຸດ ໃນຮອບສະຕະວັດ ແລະ ຈີນຢູ່ໃນໄລຍະເວລາດັ່ງກ່າວ ເຊິ່ງເປັນໂອກາດສໍາຄັນທາງຍຸດທະສາດເພື່ອການພັດທະນາ.

ຄຳຖະແຫຼງດັ່ງກ່າວຂອງຜູ້ນໍາຈີນທີ່ກ່າວໄປບໍ່ເທົ່າໃດມື້ ຫຼັງ ທ່ານ ສີ ກ່າວສຸນທອນພົດຕໍ່ທີ່ປະຊຸມສະມາຊິກກົມການເມືອງແຫ່ງຄະນະກໍາມະການກາງ ພັກຄອມມູນິດ ຫຼື ໂປລິດບູໂຣ ວາລະພິເສດ ເມື່ອວັນພຸດ ຜ່ານມາ ເນື່ອງໃນໂອກາດຄົບຮອບ 40 ປີ ນະໂຍບາຍ “ຄວາມສໍາພັນ ຂ້າມຊ່ອງແຄັບ ”  ຫຼື ເອີ້ນຢ່າງບໍ່ເປັນທາງການວ່າ “ວາລະໄຕ້ຫວັນ” ທີ່ລັດຖະບານປັກກິ່ງເປັນຝ່າຍສົ່ງສານໄປເຖິງລັດຖະບານໄທເປ ເພື່ອຮຽກຮ້ອງ “ຄວາມເປັນເອກະພາບ” ເມື່ອປີ 1978 ວ່າ ການເປັນໜຶ່ງດຽວກັນລະຫວ່າງ ລັດຖະບານໄທເປ ກັບ ແຜ່ນດິນໃຫຍ່ ເປັນສິ່ງທີ່ບໍ່ມີທາງຫຼີກລ່ຽງໄດ້ ເພາະມື້ໃດມື້ໜຶ່ງຄວາມສໍາພັນຂ້າມຊ່ອງແຄບ “ຕ້ອງສິ້ນສຸດລົງ” ດ້ວຍການທີ່ອີກຝ່າຍເຂົ້າຮ່ວມສະຖານະ “ໜຶ່ງປະເທດສອງ ລະບົບ” ກັບແຜນດິນໃຫຍ່ ເພື່ອປົກປ້ອງຜົນປະໂຫຍດ ແລະ ຄຸນນະພາບຊີວິດຂອງເພື່ອນຮ່ວມຊາດ.

ນອກຈາກນີ້ ທ່ານ ສີ ເຕືອນວ່າ ຄວາມພະຍາຍາມໃດກໍຕາມໃນການຜັກດັນ ຫຼື ກະຕຸ້ນໃຫ້ໄຕ້ຫວັນເພີ່ມການເຄື່ອນໄຫວເພື່ອເປັນເອກາລາດຈາກແຜ່ນດິນໃຫຍ່ ອາດຈະນໍາໄປສູ່ການໃຊ້ “ມາດຕະການທາງທະຫານ” ເຊິ່ງຜູ້ນໍາຈີນກໍ່ຢ້ຳວ່າ ເລື່ອງດັ່ງກ່າວເປັນສິ່ງທີ່ລັດຖະບານປັກກິ່ງຕ້ອງເຕືອນອີກຝ່າຍຢູ່ສະເໝີ ວ່າ “ບໍ່ເຄີຍຮັບຮອງວ່າຈະບໍ່ເກີດຂຶ້ນ”.