2019 ນະຄອນຫຼວງວຽງຈັນ ຕັ້ງເປົ້າເກັບລາຍຮັບໃຫ້ເພີ່ມຂຶ້ນ 11%

596

ໃນປີ 2018 ຜ່ານມາ ການຈັດເກັບລາຍຮັບງົບປະມານຂອງພະແນກການເງິນນະຄອນຫຼວງວຽງຈັນ ຄາດວ່າຈະປະຕິບັດໄດ້ຕາມແຜນການ ຫຼື ລື່ນແຜນ. ສ່ວນການຈັດເກັບລາຍຮັບໃນປີ 2019 ແມ່ນຕັ້ງເປົ້າໃຫ້ເພີ່ມຂຶ້ນ 11,04% ຂອງປີຜ່ານມາ ໂດຍຈະສຸມໃສ່ຈັດຕັ້ງປະຕິບັດບັນດາມາດຕະການ ແລະ ກົນໄກທີ່ມີ.

ອີງຕາມການເປີດເຜີຍຂອງ ທ່ານ ຄຳພັນ ມາລາບັນດິດ ຫົວໜ້າພະແນກການເງິນນະຄອນຫຼວງວຽງຈັນ ໄດ້ລາຍງານກ່ຽວກັບສະພາບການຈັດຕັ້ງແຜນງົບປະມານແຫ່ງລັດ ປະຈຳປີ 2018 ແລະ ແຜນງົບປະມານແຫ່ງລັດ ປີ 2019 ຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນນະຄອນຫຼວງວຽງຈັນ ຊຸດທີ I ໃນທ້າຍປີທີ່ຜ່ານມານີ້ ໂດຍສະເພາະແມ່ນແຜນງົບປະມານປີ 2019 ວ່າ: ອີງໃສ່ຄາດໝາຍເສດຖະກິດມະຫາພາກ, ແຜນພັດທະນາເສດຖະກິດ – ສັງຄົມ ຂອງນະຄອນຫຼວງວຽງຈັນ ເປັນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກນະຄອນຫຼວງວຽງຈັນ ແລະ ຜົນການຈັດຕັ້ງປະຕິບັດລາຍຮັບ – ລາຍຈ່າຍງົບປະມານຂອງນະຄອນຫຼວງວຽງຈັນໃນຊຸມປີທີ່ຜ່ານມາ. ສຳລັບຄາດໝາຍລາຍຮັບທີ່ກະຊວງການເງິນແຈ້ງໃຫ້ໃນເບື້ອງຕົ້ນ 1.357 ຕື້ກີບ ທຽບໃສ່ແຜນປີ 2018 ເພີ່ມຂຶ້ນ 11,04% ( ຖ້າທຽບຕາມຄວາມອາດສາມາດຕົວຈິງໃນການຈັດເກັບລາຍຮັບຂອງນະຄອນຫຼວງວຽງຈັນ ປີ 2018 ແມ່ນ 1.264 ຕື້ກີບ ເຫັນວ່າເພີ່ມຂຶ້ນ 7,39% ). ໃນນີ້, ສ່ວຍສາອາກອນ 1.293 ຕື້ກີບ ທຽບໃສ່ແຜນປີ 2018 ເພີ່ມຂຶ້ນ 11,78%. ໃນນີ້, ຖ້າທຽບໃສ່ປີຜ່ານມາເຫັນວ່າການເພີ່ມຂຶ້ນແຕ່ລະຮ່ວງລາຍຮັບຂອງສ່ວຍສາອາກອນ ເປັນຕົ້ນ ອາກອນປົກກະຕິ ເພີ່ມຂຶ້ນ 5,57%, ທີ່ດິນເພີ່ມຂຶ້ນ 2,46%, ຄ່າທຳນຽມ 172,60%, ຄ່າບໍລິການວິຊາການຫຼຸດລົງ 2,05%; ການຄຸ້ມຄອງຊັບສິນຂອງລັດ 63 ຕື້ກີບ, ທຽບໃສ່ແຜນປີ 2018 ຫຼຸດລົງ 2,05%; ຄຸ້ມຄອງລັດວິສາຫະກິດລັດລົງທຶນ ແລະ ປະກັນໄພ 633 ລ້ານກີບ ເທົ່າກັບປີ 2018.

ในภาพอาจจะมี ท้องฟ้า, เมฆ, ต้นไม้, สถานที่กลางแจ้ง และธรรมชาติ

ທ່ານ ຄຳພັນ ມາລາບັນດິດ ກ່າວຕື່ມວ່າ: ເພື່ອຮັບປະກັນໃຫ້ບັນດາຄາດໝາຍສູ້ຊົນຂອງງົບປະມານປີ 2019 ໄດ້ຮັບການຈັດຕັ້ງປະຕິບັດຢ່າງມີຜົນສຳເລັດນັ້ນ ພະແນກການເງິນ ນວ ຈະໄດ້ສຸມໃສ່ຈັດຕັ້ງປະຕິບັດບັນດາມາດຕະການ ແລະ ກົນໄກ ຄື: ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານ – ລັດຖະກອນທົ່ວຂະແໜງການເງິນຢ່າງເລິກເຊິ່ງ ແລະ ແທດເຖິງກວ່າເກົ່າ, ຍົກສູງຄວາມຮູ້, ຄວາມສາມາດ, ສະຕິຕື່ນຕົວຕໍ່ການປະຕິບັດວິໄນການເງິນ, ເຮັດໃຫ້ພະນັກງານທຸກຄົນມີ ຄວາມເຂົ້າໃຈຈະແຈ້ງຕໍ່ລະບຽບກົດໝາຍ ແລ້ວພ້ອມກັນເປັນເຈົ້າການປະຕິບັດໜ້າທີ່ວຽກງານທີ່ໄດ້ຮັບມອບໝາຍຢ່າງຕັ້ງໜ້າ ແລະ ມີລັກສະນະບຸກທະລຸກວ່າເກົ່າ, ປະຕິບັດຄຳແນະນຳສະບັບເລກທີ 4040/ກງ ລົງວັນທີ 21 ພະຈິກ 2017 ກ່ຽວກັບການຄຸ້ມຄອງວຽກງານພາສີ, ສ່ວຍສາອາກອນ ແລະ ຄັງເງິນແຫ່ງຊາດ; ເພີ່ມທະວີໃນການປະຕິບັດກົດໝາຍ, ບັນດານິຕິກຳຂອງລັດຖະບານ ແລະ ອຳນາດການປົກຄອງທ້ອງຖິ່ນທີ່ວາງອອກຢ່າງເຂັ້ມງວດ, ຕິດຕາມ, ກວດກາການເກັບລາຍຮັບຂອງພາສີ, ອາກອນ, ທີ່ດິນ, ຄ່າທຳນຽມ, ຄ່າບໍລິການວິຊາການ, ຄ່າເຊົ່າ – ສຳປະທານ, ຄ່າຊັບພະຍາກອນທຳມະຊາດ, ບັນດາຫົວໜ່ວຍລັດວິສາຫະກິດ ແລະ ລາຍຮັບອື່ນໆໃຫ້ຄົບຖ້ວນ, ສະກັດກັ້ນການລັກລອບ, ຫຼົບຫຼີກພາສີ – ອາກອນ ແລະ ການຄ້າເຖື່ອນ; ສືບຕໍ່ຫັນເອົາຖານຂໍ້ມູນລາຍຮັບເຂົ້າສູ່ການຄຸ້ມຄອງດ້ວຍເຄື່ອງມືທັນສະໄໝນັບມື້ຄົບຖ້ວນ ແລະ ຫັນເອົາການຊຳລະພັນທະພາສີ – ອາກອນ ແລະ ຄ່າທຳນຽມຕ່າງໆຜ່ານລະບົບທະນາຄານ; ເດັດຂາດ ແລະ ເຂັ້ມງວດການປະຕິບັດວິໄນການເງິນ, ສະກັດກັ້ນຊ່ອງວ່າງການຕົກເຮ່ຍເສຍຫາຍຂອງລາຍຮັບ ແລະ ລາຍຈ່າຍງົບປະມານຢ່າງ ກວ້າງຂວາງ, ມີຈຸດສຸມ ແລະ ປະຕິບັດໃຫ້ໄວ ພ້ອມທັງການເຜີຍແຜ່ໂຄສະນາຕໍ່ອົງການຈັດຕັ້ງ, ສັງຄົມ ແລະ ສື່ມວນຊົນຕ່າງໆ ເພື່ອເພີ່ມທະວີຄວາມຮັບຜິດຊອບຂອງບັນດາອົງການຈັດຕັ້ງ, ພະນັກງານ – ລັດຖະກອນ ແລະ ພາກສ່ວນທຸລະກິດຕ່າງໆຕໍ່ວິໄນການເງິນຂຶ້ນຕື່ມ.

ในภาพอาจจะมี ท้องฟ้า และสถานที่กลางแจ้ง

CR:Laoedaily