ແອັບເປິ້ລຫຼຸດຄາດໝາຍລາຍໄດ້ ຍ້ອນກະແສຍອດຂາຍໃນຈີນບໍ່ດີ

208

ບໍລິສັດແອັບເປິ້ລປັບຫຼຸດຄາດໝາຍລາຍໄດ້ຂອງບໍລິສັດ ໃນໄລຍະ 3 ເດືອນຫຼ້າສຸດ ຈາກຄວາມຂັດແຍ່ງທາງການຄ້າ ລະຫວ່າງ ອາເມຣິກາ ກັບ ຈີນ ທີ່ຍັງຕຶງຄຽດຢູ່ ແລະ ກໍລະນີການຈັບກຸມລູກສາວເຈົ້າຂອງບໍລິສັດຫົວເຫວີ່ຍ ສົ່ງຜົນກະທົບຕໍ່ຍອດຈໍາໜ່າຍຜະລິດພັນແອັບເປິ້ລ.

ສໍານັກຂ່າວຕ່າງປະເທດລາຍງານຈາກເມືອງຊານຟຣານຊິສໂກ ປະເທດອາເມລິກາ ເມື່ອວັນພຸດ ທີ 2 ມັງກອນ ວ່າ ບໍລິສັດແອັບເປິ້ລອອກລາຍງານເມື່ອວັນພຸດ ກ່ຽວກັບການຄາດໝາຍລາຍໄດ້ຂອງບໍລິສັດ ໃນໄຕມາດ ລະຫວ່າງ ເດືອນຕຸລາ ເຖິງ ເດືອນທັນວາ ເຊິ່ງເປັນໄຕມາດທໍາອິດຕາມປີງົບປະມານຂອງແອັບເປິ້ລ ແລະ ເປັນໄລຍະທີ່ມີເທສະການຊື້ຂາຍໃຫຍ່ຫຼາຍລາຍການທີ່ລວມເຖິງວັນຄຣິສມາສ, ປີໃໝ່ສາກົນ ແລະ ວັນຄົນໂສດ 11.11 ໃນຈີນ ໄວ້ປະມານ:

84.000 ໂດລາ (ກວ່າ 724.000 ຕື້ກີບ) ໜ້ອຍກວ່າທີ່ມີການວິເຄາະໄວ້ກ່ອນໜ້ານີ້ພໍສົມຄວນ

ຄາດການກ່ອນໜ້ານີ້ ວ່າອາດຈະສູງເຖິງ 91.000 ລ້ານໂດລາ (ກວ່າ 785.000 ຕື້ກີບ)

ຂະນະທີ່ ການວິເຄາະຂອງສໍານັກງານວິໄຈບາງແຫ່ງ ຄາດການໄວ້ສູງເຖິງ 93.000 ລ້ານໂດລາ (ກວ່າ 802.000 ຕື້ກີບ)

ສ່ວນລາຍງານຢ່າງເປັນທາງການຈະມີການເປີດເຜີຍໃນວັນທີ 29 ມັງກອນ 2019 ນີ້.

ในภาพอาจจะมี โทรศัพท์

ຂະນະດຽວກັນ ເນື້ອໃນຂອງການຖະແຫຼງການຍັງລະບຸຄໍາກ່າວຢ່າງກົງໄປກົງມາຂອງ ທ່ານ ທິມ ຄຸກ ປະທານຄະນະເຈົ້າໜ້າທີ່ບໍລິຫານ (CEO) ຂອງແອັບເປິ້ລ ວ່າ ບໍລິສັດເປັນໜຶ່ງໃນຜູ້ປະກອບການຂອງອາເມຣິກາທີ່ໄດ້ຮັບຜົນກະທົບໂດຍກົງຈາກຄວາມ ຂັດແຍ່ງທາງການຄ້າ ລະຫວ່າງ ອາເມຣິກາ ກັບ ຈີນ ທີ່ຍັງບໍ່ມີຂໍ້ສະຫຼຸບເພື່ອຫາທາງອອກ ແລະ ສະພາບແວດລ້ອມດ້ານການຕະຫຼາດໃນຈີນ ໃນໄລຍະນີ້ ສົ່ງຜົນໃຫ້ສິນຄ້າຂອງແອັບເປິ້ລເຂົ້າເຖິງຜູ້ບໍລິໂພກໃນຈີນຍາກຂຶ້ນ.

ທັງນີ້ ລາຄາຫຸ້ນຂອງແອບເປີ້ລຕົກລົງ 7,7% ໃນໄລຍະນອກເວລາການຊື້-ຂາຍ ຫລັງປິດຕະຫຼາດ ເມື່ອວັນພຸດ ຢູ່ທີ່ 146,40 ໂດລາ (ປະມານ 1.262.000 ກີບ) ແລະ ຍັງສົ່ງຜົນໃຫ້ມູນຄ່າທາງການຕະຫຼາດຂອງບໍລິສັດຫຼຸດລົງ ຕ່ໍາກວ່າ 700.000 ລ້ານໂດລາ (ກວ່າ 6 ລ້ານຕື້ກີບ) ອີກປະການໜຶ່ງ ລາຄາຫຸ້ນຂອງແອັບເປິ້ລຕົກລົງແລ້ວ ຫຼາຍກວ່າ 32% ຕັ້ງແຕ່ເດືອນຕຸລາ ປີທີ່ຜ່ານມາ ຫຼັງກະແສຕອບຮັບສະມາດໂຟນລຸ້ນຫຼ້າສຸດຍັງບໍ່ເປັນໄປຕາມຄວາມຄາດຫວັງຂອງຫຼາຍຝ່າຍ.

ເຊິ່ງກໍ່ບໍ່ສາມາດປະຕິເສດໄດ້ວ່າ ແອັບເປິ້ລຍິ່ງເປັນປັດໄຈໃນການກະຕຸ້ນຄວາມຮູ້ສຶກຊາດນິຍົມໃນຈີນໂດຍອັດໂນມັດຈາກການທີ່ເຈົ້າໜ້າທີ່ປະເທດການາດາ ຄວບຄຸມຕົວ ທ່ານນາງ ເມິ່ງ ຫວ່ານໂຈວ ຜູ້ບໍລິຫານລະດັບສູງ ແລະ ເປັນສູກສາວຂອງຜູ້ກໍ່ຕັ້ງຫົວເຫວີ່ຍ ຕັ້ງແຕ່ ວັນທີ 1 ທັນວາ ປີທີ່ຜ່ານມາ ເພື່ອລໍຖ້າການຂຶ້ນສານ ໃນວັນທີ 6 ກກຸມພາ ນີ້ ວ່າ ຄໍາຮ້ອງຮຽນຂອງອາເມຣິກາ “ມີນ້ໍາໜັກພຽງພໍ” ໃນການຂໍນຳຕົວຜູ້ກ່ຽວໄປດໍາເນີນຄະດີໃນຖານະຜູ້ຮ້າຍຂ້າມແດນ ໃນຂໍ້ຫາລະເມີດມາດຕະການຂວ້ຳບາດປະເທດອິຣ່ານ ຫຼື ບໍ່ ເຊິ່ງກໍລະນີດັ່ງກ່າວ ກາຍເປັນກະແສປຸກລະດົມກີດກັນການນຳໃຊ້ສິນຄ້າຂອງແອັບເປິ້ລ ໃຫ້ໄປໃຊ້ຍີ່ຫໍ້ຫົວເຫວີ່ຍ ຫຼື ຍີ່ຫໍ້ສ່ຽວໝີ່ແທນ ແລະ ການທີ່ແອັບເປິ້ລ ຍັງຈໍາໜ່າຍໄອໂຟນ 7 ລຸ້ນ ໃນຈີນ ເຊິ່ງເປັນລຸ້ນທີ່ສານປະຊາຊົນຊັ້ນກາງ ໃນເມືອງຝູໂຈວ ຂອງມົນທົນຝູຈ້ຽນ ສັ່ງຫ້າມເມື່ອເດືອນທີ່ຜ່ານມາ ຈາກກໍລະນີພິພາດກັບບໍລິສັດຄວອລຄອມ ຜູ້ຜະລິດໄມໂຄຣຊິບລາຍໃຫຍ່ຂອງໂລກ ຈາກອາເມຣິກາເຊັ່ນກັນ ເຮັດໃຫ້ແອັບເປິ້ລຕົກຢູ່ໃນສະຖານະທີ່ບໍ່ດີຕໍ່ທັດສະນະຄະຕິຂອງຄົນຈີນ ທີ່ເຫັນວ່າແອັບເປິ້ລບໍ່ເຄົາລົບກົດໝາຍ.