ລັດກຽມໃຊ້ມາດຕະການຕໍ່ຜູ້ທີ່ຍັງຂາຍເຄື່ອງຊະຊາຍ

287

ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ໄດ້ລົງກວດກາ ຄວາມເປັນລະບຽບຂອງແມ່ຄ້າຊາວຂາຍຢູ່ບັນດາເມືອງຕ່າງໆໃນນະຄອນຫຼວງວຽງຈັນ ຜ່ານການກວດກາຍັງພົບເຫັນການຂາຍເຄື່ອງຊະຊາຍ ໃນ 5 ຕົວເມືອງ ມີ 320 ກວ່າຮ້ານ, ສ່ວນໃຫຍ່ຂາຍຕາມແຄມທາງ ແລະ ໃກ້ໂຮງງານຕັດຫຍິບ, ຂະນະທີ່ແຜນການແກ້ໄຂໃນປີ 2019 ແມ່ນເນັ້ນປະຕິບັດ 7 ຂໍໍ້ກຳນົດ ເພື່ອແກ້ໄຂການຂາຍເຄື່ອງຊະຊາຍ.

ຕາມບົດລາຍງານຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ I ທີ່ຈັດຂຶ້ນໃນລະຫວ່າງວັນທີ 25 – 27 ທັນວາ 2018 ຜ່ານມາ ໃຫ້ຂໍ້ມູນຊີ້ແຈງແກ້ໄຂ ແລະ ຈັດສັນຕະຫຼາດ ປະຈຳປີ 2018 ຂອງທ່ານຫົວໜ້າພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ     ( ນວ ) ໃຫ້ຮູ້ວ່າ: ອີງຕາມຂໍ້ຕົກລົງ ສະບັບເລກທີ 1184/ຈນວ ລົງວັນທີ 20 ທັນວາ 2017 ມາດຕາ 7 ຂົງເຂດການຄ້າຈະຈັດສັນສະເພາະພາຍໃນຕະຫຼາດ, ຮ້ານຄ້າທີ່ໄດ້ຮັບອະນຸຍາດ, ບໍ່ໃຫ້ວາງຂາຍຊະຊາຍ ແລະ ວາງສິນຄ້າອອກມາເກີນຂອບເຂດໜ້າຮ້ານຂອງຕົນ ຈາກການຈັດຕັ້ງປະຕິບັດໃນ 5 ເມືອງ ຄື: ເມືອງຈັນທະບູລີ, ສີສັດຕະນາກ, ໄຊເສດຖາ, ສີໂຄດຕະບອງ ແລະ ໄຊທານີ ພົບເຫັນການຂາຍເຄື່ອງຊະຊາຍ ຈຳນວນ 324 ຮ້ານຕໍ່ຄົນ, ແກ້ໄຂແລ້ວ 88 ຮ້ານຕໍ່ຄົນ ແລະ ຍັງສືບຕໍ່ແກ້ໄຂ 236 ຮ້ານຕໍ່ຄົນ ເຊິ່ງສ່ວນຫຼາຍຈຸດທີ່ເກີດມີການຂາຍເຄື່ອງຊະຊາຍແມ່ນຢູ່ຕາມແຄມທາງ, ໃກ້ໂຮງງານຕັດຫຍິບ, ເຂດແຄມຂອງຫາດດອນຈັນ ບໍລິເວນສວນເຈົ້າອານຸວົງ ແລະ ເມື່ອສັງລວມເບິ່ງແລ້ວການແກ້ໄຂການຂາຍເຄື່ອງຊະຊາຍໄດ້ເຮັດຢ່າງຕັ້ງໜ້າ ແຕ່ຊາວຄ້າຂາຍຍັງມີການລະເມີດ, ບໍ່ປະຕິບັດຕາມລະບຽບການ ເມື່ອເວລາເຈົ້າໜ້າທີ່ບໍ່ຢູ່ກໍ່ກັບມາຂາຍຄືເກົ່າ ໂດຍສະເພາະເວລານອກໂມງການ, ວັນເສົາ ແລະ ວັນອາທິດ.

ສຳລັບມາດຕະການຈັດຕັ້ງປະຕິບັດ ໃນປີ 2019 ໃນການແກ້ໄຂການຂາຍເຄື່ອງຊະຊາຍ, ອີງຕາມມະຕິຕົກລົງກອງປະຊຸມອົງການປົກຄອງ ສະບັບເລກທີ 09 ລົງວັນທີ 17 ທັນວາ 2018 ມີດັ່ງນີ້:

1). ຄົ້ນຄວ້າປັບປຸງລະບຽບການ ວ່າດ້ວຍການຈັດສັນຕະຫຼາດ ສະບັບເລກທີ 0348/ນຈວ ລົງວັນທີ 19 ເມສາ 2010 ໂດຍແຍກໃຫ້ລະອຽດເປັນສອງເຂດ ຄື: ຕະຫຼາດໃນເທສະບານ ແລະ ຕະຫຼາດຊານເມືອງ, ສຳລັບຕະຫຼາດໃນເທສະບານແນໃສ່ຫັນທ່າອ່ຽງໃຫ້ທັນສະໄໝດ້ານບໍລິການ, ການກຳນົດຕາມມາດຕະຖານຕະຫຼາດຂອງບັນດາປະເທດອາຊຽນ, ວາງມາດຕະຖານສູງ, ທັນສະໄໝ, ມີຄວາມເປັນລະບຽບຮຽບຮ້ອຍ, ບໍ່ໃຫ້ຈອດລົດຕັນທາງ ແລະ ໃຫ້ຫ່າງອອກຈາກແຄມທາງເຂົ້າໄປ, ໃຫ້ຖືບັນຊີ, ນຳໃຊ້ເຄື່ອງມືທັນສະໄໝ ແລະ ກຳນົດນະໂຍບາຍ ເພື່ອສົ່ງເສີມໃຫ້ຜູ້ຄ້າຂາຍຊະຊາຍຕາມແຄມທາງໃຫ້ເຂົ້າໄປຂາຍໃນຊຸບເປີມາເກັດ ແລະ ຫ້າງສັບພະສິນຄ້າ. ສ່ວນຕະຫຼາດຊານເມືອງກໍ່ບໍ່ຈຳເປັນມີມາດຕະຖານສູງ ແຕ່ຈະອີງໃສ່ຫຼັກການ ຄວາມເປັນລະບຽບຮຽບຮ້ອຍ ແລະ ຮັກສາຄວາມປອດໄພໄດ້;

2). ຊຸກຍູ້ບັນດາຕະຫຼາດໃນການສ້າງຕັ້ງກຸ່ມທຸລະກິດຈັດສັນຕະຫຼາດ, ຈະໄດ້ຄົ້ນຄວ້າຊື່ໃໝ່ໃຫ້ເປັນໄປຕາມກົດໝາຍ ອາດເປັນສະມາຄົມຕະຫຼາດ ຫຼື ຊື່ໃດທີ່ກົດໝາຍກຳນົດ;

3). ພາຍຫຼັງປັບປຸງກົດລະບຽບ ສະບັບປັບປຸງສໍາເລັດ ແລະ ຮັບຮອງແລ້ວ, ຈະໄດ້ຈັດສຳມະນາຮ່ວມກັບແຕ່ລະຂະແໜງການ ແລະ ບັນດາຫ້າງສັບພະສິນຄ້າ, ຊຸບເປີມາເກັດ, ເຈົ້າຂອງຕະຫຼາດ ເພື່ອໃຫ້ນຳໃຊ້ຈັດຕັ້ງປະຕິບັດໄດ້;

4). ອອກແຈ້ງການເຖິງເຈົ້າຂອງຕະຫຼາດ ກ່ຽວກັບໂມງເປີດ – ປິດຕະຫຼາດໃຫ້ຄຸ້ມຄອງໄດ້ ເປັນຕົ້ນຄວາມປອດໄພ ແລະ ຄວາມເປັນລະບຽບຮຽບຮ້ອຍ;

5). ຄົ້ນຄວ້ານິຕິກໍາວ່າດ້ວຍຂັ້ນຄຸ້ມຄອງລະ ຫວ່າງນະຄອນຫຼວງວຽງຈັນ, ພະແນກອຸດສາຫະກໍາ ແລະ ການຄ້າ ແລະ ເມືອງ ເພື່ອເປັນບ່ອນອີງໃນການຈັດຕັ້ງປະຕິບັດ.

6) ສືບຕໍ່ຊຸກຍູ້ການແກ້ໄຂບັນຫາອື່ນໆ ຫຼື ຂໍ້ຂັດແຍ່ງລະຫວ່າງຕະຫຼາດ ຕາມມະຕິຕົກລົງຂອງອົງການປົກຄອງນະຄອນຫຼວງວຽງຈັນ ຂັ້ນໃດຮັບຜິດຊອບແມ່ນມອບໃຫ້ຂັ້ນນັ້ນເປັນຜູ້ຕັດສິນຊີ້ຂາດ;

7). ສືບຕໍ່ຊຸກຍູ້ໃຫ້ຄະນະຄຸ້ມຄອງຕະຫຼາດຂັ້ນເມືອງຈັດສັນຕະຫຼາດເປົ້າໝາຍຂອງເມືອງ ໃຫ້ເປັນຕະຫຼາດມາດຕະຖານຢ່າງໜ້ອຍ 2 ແຫ່ງຢູ່ເມືອງໄຊເສດຖາ ແລະ ເມືອງສີສັດຕະນາກ.

ພ້ອມດຽວກັນ, ກໍ່ຈະຈັດຕັ້ງປະຕິບັດ 4 ມາດຕະການ ຄື: 1). ຈະຈັດຕັ້ງການສຳມະນາໃຫ້ຜູ້ປະກອບການ, ຫົວໜ່ວຍທຸລະກິດຈັດສັນຕະຫຼາດ, ສູນການຄ້າ, ຮ້ານສັບພະສິນຄ້າໃຫ້ຮັບຮູ້ ແລະ ເຂົ້າໃຈຕໍ່ແຜນການພັດທະນານະຄອນຫຼວງຕາມທິດຫັນເປັນທັນສະໄໝມີຄວາມຍືນຍົງ; 2). ອອກນິຕິກຳໃນການຄຸ້ມຄອງຕະຫຼາດ, ການຂາຍເຄື່ອງຊະຊາຍເພື່ອເປັນບ່ອນອີງໃນການຫັນເອົາຊາວຄ້າຂາຍຊະຊາຍເຂົ້າໄປຢູ່ໃນຮ້ານສັບພະສິນຄ້າ; 3). ຕ້ອງໄດ້ແບ່ງຄວາມຮັບຜິດຊອບໃນການຄຸ້ມຄອງໃຫ້ຈະແຈ້ງ, ຊັດເຈນ, ຂັ້ນໃດເປັນຜູ້ອະນຸຍາດແມ່ນຂັ້ນນັ້ນເປັນຜູ້ຄຸ້ມຄອງຊີ້ຂາດ ເພື່ອຫຼີກລຽງການໂຍນ ຄວາມຮັບຜິດຊອບ ແລະ 4). ເພີ່ມທະວີການຕິດຕາມ, ກວດກາປະເມີນຜົນການຈັດຕັ້ງປະຕິບັດວຽກດັ່ງກ່າວເປັນແຕ່ລະໄລຍະ ເພື່ອແກ້ໄຂບັນຫາການຂາຍເຄື່ອງຊະຊາຍ.