ເຈົ້າແຂວງອັດຕະປືຊີ້ນຳເລັ່ງສ້າງເຮືອນພັກຊົ່ວຄາວ ທີ່ເມືອງສະໜາມໄຊ ໃຫ້ສຳເລັດໃນເດືອນນີ້

281

ເມື່ອບໍ່ດົນມານີ້ ທ່ານ ເລັດ ໄຊຍະພອນ ເຈົ້າແຂວງໆອັດຕະປື ພ້ອມດ້ວຍຄະນະ ກໍໄດ້ລົງເຄື່ອນໄຫວຕິດຕາມຄວາມຄືບໜ້າການກໍ່ສ້າງ ເພື່ອຊີ້ນໍາພາກສ່ວນບໍລິສັດຜູ້ຮັບເໝົາກໍ່ສ້າງເຮືອນພັກຊົ່ວຄາວໃຫ້ຜູ້ປະສົບໄພຢູ່ເມືອງສະໜາມໄຊໃຫ້ສຳເລັດໃນເດືອນມັງກອນນີ້.

ການລົງຕິດຕາມຊຸກຍູ້ຂອງເຈົ້າແຂວງໃນຄັ້ງນີ້ ແມ່ນໄດ້ລົງຢູ່ 3 ສູນ ຄື: ສູນດອນບົກ ມີຈຳນວນ 125 ຄອບຄົວ, ມີ 523 ຄົນ ທີ່ຍ້າຍມາຈາກບ້ານທ່າແສງຈັນ ທີ່ຖືກຜົນກະທົບ, ເຮືອນພັກຊົ່ວຄາວທີ່ກຳລັງເລັ່ງມືກໍ່ສ້າງໃນສູນດອນບົກ ມີທັງໝົດ 178 ຫຼັງ. ໃນນັ້ນ, ສ້າງສຳເລັດ 62 ຫຼັງ; ສູນປິນດົງ ມີຈຳນວນ 89 ຄອບຄົວ ທີ່ຍ້າຍມາຈາກບ້ານສະໝອງ ທີ່ຖືກຜົນກະທົບ, ເຮືອນພັກຊົ່ວຄາວທີ່ກຳລັງເລັ່ງມືກໍ່ສ້າງມີທັງໝົດ 90 ຫຼັງ, ເຮືອນຄູ່ 23 ຫຼັງ ດ່ຽວ 67 ຫຼັງ. ໃນນັ້ນ, ກໍ່ສ້າງສຳເລັດ 15 ຫຼັງ, ສູນຕະມໍຢອດ ຍ້າຍມາຈາກບ້ານຫີນລາດ ທີ່ຖືກຜົນກະທົບ ມີຈຳນວນ 176 ຄອບຄົວ, ມີຈຳນວນພົນ 712 ຄົນ ແລະ ບ້ານຕະມໍຢອດມີ 45 ຄອບຄົວ ພົນລະເມືອງ 169 ຄົນ, ເຮືອນພັກຊົ່ວຄາວມີທັງໝົດ 196 ຫຼັງ, ເປັນເຮືອນດ່ຽວ ກໍ່ສ້າງສຳເລັດຂຶ້ນຢູ່ແລ້ວ 103 ຫຼັງ, ຍັງ 74 ຄອບຄົວ ບໍ່ທັນເຂົ້າຍ້ອນບາງຄອບຄົວມີຈຳນວນຄົນຫຼາຍຈຳເປັນໄດ້ລໍຖ້າເຮືອນຄູ່ປະກອບສຳເລັດ ເພາະຢູ່ໄດ້ຫຼາຍຄົນ.

ບໍລິສັດທີ່ເປັນເຈົ້າຂອງຮັບເໝົາກໍ່ສ້າງຢູ່ໃນ 3 ສູນ ລວມມີ 5 ບໍລິສັດທີ່ເຮັດໜ້າວຽກແຕກຕ່າງກັນ ຄື: ບໍລິສັດບຸກເບີກ, ບໍລິສັດກໍ່ສ້າງປະກອບເຮືອນ, ບໍລິສັດຕິດຕັ້ງນ້ຳສະອາດ, ບໍລິສັດ ຕິດຕັ້ງວິດ – ຄອງນໍ້າ ແລະ ບໍລິສັດຕິດຕັ້ງລະບົບໄຟຟ້າ. ປັດຈຸບັນເພື່ອເລັ່ງມືໃນການກໍ່ສ້າງໃຫ້ສຳເລັດທັນກັບເວລາທີ່ຜູ້ຖືກຜົນກະທົບຄອງຄອຍນັ້ນ ຄະນະນຳຂອງແຂວງໄດ້ນຳເອົາກຳລັງທະຫານເຂົ້າມາຊ່ວຍໃນການກໍ່ສ້າງສູນລະ 40 ຄົນ ຮ່ວມກັບ ບໍລິສັດໃນການກໍ່ສ້າງ ເພື່ອເລັ່ງໃນການປະກອບ ແລະ ຕິດຕັ້ງໃຫ້ສຳເລັດໃນເດືອນມັງກອນ 2019.

ໃນການລົງຊຸກຍູ້ຢູ່ໃນ 3 ສູນຄັ້ງນີ້ ທ່ານ ເລັດ ໄຊຍະພອນ ເຈົ້າແຂວງໆອັດຕະປື ກໍໄດ້ຊີ້ນຳໃຫ້ພາກສ່ວນຮັບເໝົາກໍ່ສ້າງ ແລະ ກຳລັງທະຫານເອົາໃຈໃສ່ຮີບຮ້ອນສືບຕໍ່ໃນການປະກອບ ແລະ ຕິດຕັ້ງໃຫ້ຖ່ວງທັນ ເພື່ອກຽມຈັດສັນຍົກຍ້າຍປະຊາຊົນບ້ານທີ່ຍັງຄົງຄ້າງໃນແຕ່ລະຈຸດພັກນີ້ໄດ້ເຂົ້າຢູ່ໂດຍໄວ ແລະ ທັນໃນເດືອນມັງກອນ 2019.

[ ໂດຍ: ມາລາທິບ ]

CR:laoedaily